Kum 1977-ah khan kum 20 a upa Colleen Stan chu an chenna Oregon-a Eugene khua atangin California-a Redding lam panin a zin chhuak a, kawngah lirthei a phar chawp a ni. California-ah hian Redding-a a thiannu piancham lawmna ve hmanpui a tum a, Redding thleng tur hian Interstate 5 lamlian chu a zawh a, kawngah hian chu piancham lawmnaah chu a thleng zo dawn lo tih a inhre awm love. Oregon atang hian California chu May ni 19, kum 1977 ah a lut a. Lirthei phar chawpa zin kualah hian tawnhriat a lo neih tawh avangin a lirthei chuanna tur a thlang fimkhur thiam a, chumi ni pawh chuan thil a kaltluang vek turah a ngai a ni.
Lirthei chuanna tur a hmuh hmasak pahnih chu a kal tumna nen a inmil loh deuh bakah him lova a hriat avangin a hnar phawt a, a pathumna chuan a nun a thlak danglam ta a ni. A lirthei chuanna chu van pawl a ni a, a khalhtu mipa la naupan hmel tak mai chu a nelawm mai bakah a bulah chuan a nupui a thu a, a hnungah chuan an fa la naupang tak mai chu a chuang bawk a. Coleen chuan hmelhriat lo lirthei chuan turah chuan chhungkua a nih avangin a him ber turah a ngai a, chumi nia a lirthei phar din zingah chuan a nelawm ber niin a hre nghe nghe a. Hlauhthawnna nei miah lovin van pawlah chuan a lut ta a ni.
Lirthei kalhtute nupa chu Cameron leh Janice Hooker te an ni a, Red Bluff California-a cheng, nupa pangngai tak anga lang an ni. An la naupang dun khawp mai, Cameron hi kum 24 mi a ni a, Janice hi kum 10 mi a ni ve thung a, hetiang lai hian Colleen kum 21 mi a ni. A chuanna lirthei neitu chhungkua chu an lan dan ang a ni lo tih erawh chu Colleen hian a hre hauh lo mai. Cameron hi hursualna lama suangtuahna rapthlak tak mai nei a ni a, Janice hian a pasal dik lohna hi siamthat tum ta lovin a takah a chantir zawk tih theih tur a ni. California-a nupa hlauhawm berte zinga mi an ni. Cameron hi thing laknaa hnathawk niin a nupui hi kut a thlak nasa thei hle a, electric shock hmang hremte leh thi lek lek khawpa tuia hnim changte pawh a nei a, chutiangah chuan a zauthau tlat zel a ni. Janice hian a pasal hi a hmangaih avangin kut tawrh tih bawr vel chu ngaiah a nei thei mai ni tur a ni, fa neiin an nupa an la ni a, an la awm tlang thei zel a ni.
Fa nei tur hian an nupa hian inremna hremhmun rim nam erawh chu an nei thung a. Chu chu Janice hian Cameron-a fa a neih chuan Janice-i phalna thlapin Cameron hian hmeichhia a rubovin sal angin a hmang thei ang tih hi a ni a. Janice-i kutthlak ai zawng zawng pawh a sal chuan a tuar tawh dawn a ni. Lirtheia Colleen-i an phurh pawh hian chu chu an rilrua awm sa a ni a, a hmasa ber phei chu a nih loh hmel hle, an nupa hian kum 19-a upa Marie Elizabeth Spannhake-i rukbona leh hrenna te, nghaisakna, pawngsual leh thahnaah a mawhphurtua ngaih an ni. Chutiang rilru pu ran chuan an lirtheiah an chuantir ta tihna a ni.
Mahse a tirah chuan an nupa hian chuti zawng chuan chet an thawh bik lova, mahse Cameron hian a lirthei darthlalang atang a en duh danah Colleen hian nuam lo tihna leh ngaihthat lohna chu a nei thung a. Lirthei tui thun tura an chawlh tumin Colleen hi inthiarna lamah a lut a, a hnua a sawi leh danin ka rilru tak chuan lirtheia let tawh lovin bathroom tukverh atanga zuan chhuah a, hawikir tawh miah lo tura tlan chhiat ka duh a, mahse chu rilru leh hlauhna chu inhnehtir lovin lirtheiah chuan ka chuang zui leh ta a ni, a ti a, a thiannu piancham lawm turin North Carolina lam chu an pan leh ta a ni.
Mahse rei an tlan hman lo, Cameron chuan kawngpui fal laiah a lirthei chu a tiding a, chem phawrhin Colleen chu a man bet ta mai a. A che emaw a au a nih vaih chuan a hrawk zaiah a vau zui nghal a ni. Lirthei atang chuan thinga siam bawm, kg 9 vela rit leh ri chhuah theih lohna tura phui tak maia siam chu rawn la chhuakin Colleen chu a khumtir nghal a. Janice chuan thutthleng rawn la chhuak vein Colleen chu chutah chuan a lo phuar bet ve bawk a, rukbo a ni ta der a ni.
An inphuar zawhah chuan North Carolina lam pan lovin mel 21 a hlaa awm an in, Red Bluff lamah chuan an kir leh ta a. Eitur leiin vawikhat chiah kawng lakah an ding a ni. Red Bluff hi Colleen-i chenna Eugene atanga mel 355 vela hla a ni a, a bo tih hi hriat a nih hnuah pawh chutiang thleng thleng chu police lamin an rawn umzui lo tawp turah Cameron te nupa chuan an ngai a ni.
Red Bluff chu an thleng a, Colleen-i tan hrehmun a intan ta chiah a tih theih awm e. Bawm an khumtir kha ri chhuah theih lohna tur khawpa phui a nih avangin boruak a lut tha thei lova, a thaw chhamin a thi thelh nghe nghe a, engmah a hmuh theih loh bawk nen Colleen tan chuan chu ringawt pawh chu thil rapthlak tak a tling tawh a. Mahse a chunga thil thleng tur ngaihtuah chuan chu chu nep te a la ni thung.
In an thlenpui hnuah Colleen chu in hnuai lamah an hnukthla a, nghaisakna hmahruai a tuar zui ta nghal a. A thawmhnaw zawng zawng phelhsakin a kutah an phuar a, in chungah an khai kang a. Cameron chuan hrui hrual hmangin dimna tel miah lovin a vaw zui ta a, Janice chuan Colleen-i a sawisa lai hi a lo enliam mai mai a ni. Cameron-a suangtuahna tuihnai lo leh rapthlak takah khan a kut tuartu chu ngawi rengin a awm tur a ni a, chuvangin Colleen chuan aw a chhuah a nih vaih chuan na taka sawisain thahah a vau a. A na tawrh zawng zawng pawh chu awrawl chhuah miah lova a tawrh a tul a ni.
A hnua Janice-i sawi leh danin Marie Elizabeth-i an sawisak tumin awrawl a chhuah a, chuvangin Cameron chuan a aw bawm a tihchhiatsak a ni awm e. Mahse hei hi finfiah loh a ni thung. Colleen chu darkar engemaw zat chhung dimna tel miah lovin Cameron chuan a nghaisa a, in hnuaia pawikhawihna rapthlak zet mai thleng chu in chunga an fanu awm takngial pawhin a hriatpui lo a ni. Chutia tharum thawh zawnga duhtawk a ngah hnuah chuan Cameron leh Janice te chuan Colleen-i an khaikanna hnuaiah chuan nupa nun an hmang zui a. A hnua Colleen-i sawi danin, Janice-in ngawi renga min lo thlir liam mai mai thei leh chumi hnua nupa nun an la hmang zui thei kha chu khawvela thil rapthlak ber a tling awm e. Khata tang khan min thah loh rinna reng reng ka nei lo, a ti.
Mahse thah kha Cameron te nupa hian an thupui tehchiam lo thung a, chu ai chuan duh tawka an sawisak theih, mihring pawh ni lovin naute lem hnawhpuar anga duh duha chin phar theih, nunna leh hlutna nei lo anga enkawl chu an duhdan a ni zawk thung. A zan khatnaah hian Colleen chu thir khaidiat hmanga phuarin a len tawk velna tur bawm, kuang ni zawk awm takah chuan an dah ta a. Chu bawm tawtah chuan Colleen hian ni khatah darkar 23 te hun a hmang thin a, a chet theih loh piah lamah a uap bawk nen, a hreawm hle ang. A chhuah chhun darkar khat lah chu an nupa inchhaihna atan an hmang a, rawng taka Cameron-a kutthlak a tuar ta thin a. Chu chuan Cameron chu a tizauthau viau a ni awm e. Janice hian engtin nge a ngaih chiah tih chu hriat a ni lova, mahse ngawi renga a lo en theih danah nuam a ti ve tho a nih loh vek chuan a pasal hian Colleen-i ang bawk hian a lo tirethei hle tawh a, a aia tuartu chu khawngaihna nei miah lovin a lo thlirpui ve thei tihna a ni thei bawk a, a engti kawng zawng pawhin nupa khawlo tak an ni takzet mai.
Cameron hi a chet danah hian a thil tumah a chiang a, Colleen-i thunun turin a tir te atangin a thluak a su nghal tih a hriat theih awm e. Bawm a khumtir hmangin rawl a chhuah tur chu a khap nghal a. Chubakah chuan thawk a harsatna turin a awmah rek takin a phuar bawk a, thawk ringawt tum laiin au chhuah chu a buaipui hman tawh lo hrim hrim. A chang leh Colleen chu riltam takin a hrek thin a, tui leh alu chauh a pek changte a awm a, a zun leh ek thiar turin bed pan a chhawp mai bawk. Hei hi Colleen-i’n a hlauh theihna tura a tih niin kut a thlakna chu a ti na tial tial a, hmanlaia taksa phuar beh leh an taksa pawh mar angte khan darkar tel a hrem a. Chumi zawhah chuan eitur a pe thin a, Colleen chu khunghran, hlauh reng renga hun hmantir leh riltama hrek hmangtein a sawisa tihna a ni a. Thla khat chhung vel hetianga hreawm a tuar hnuah hian Colleen chuan a a mai dawna hriatna te a nei nghe nghe.
Pawn lama mite chuan Cameron te inchhungah chuan eng nge thleng an hre hauh lova, rinhlelhna pawh an nei lo bawk. An chhungkua hian bengchheng siam lo chi tak an ni bawk nen, an thenawmte chuan chhungkaw tha tak angah an ngai a ni.
Colleen-i te khua Eugene lamah a bo atanga ni rei vak lo hnuah khan a chhungte chuan a bo thu hi thuneitu lam an hrilh a. An zawn hnuah hmuh leh inbeiseina an nei tawh lo. An rindan chuan Colleen chu Oregon-ah tuemaw in a rubovin a that ni turah an ngai a, nupa thil tih a ni thei ang tih rin ngaihna reng reng an hre lo a ni. Colleen-i laka pawikhawih thei an zawn kualnaah a bialpa hlui, kum 17 mi a nih laia reilote chhung a pasal hual te pawh lo ni tawh Tom Smith chu rinhlelh berah an nei a. Mahse Colleen-i zawn hmuh lam chu a hnai lo hle.
Red Bluff lamah Colleen chuan nitin nghaisak leh kutthlak a tuar zui zel a. Tan in aiah bawm tawt, kuang ang tiat vel chu a awmna a ni a. A chhungah chuan mut bu leh benghnawh te dah niin boruak luhna tur awng a awm ve tawh thung a. Chu bawm tawt chu Colleen-i khawvel a ni ta deuh ber a, a khawvel a zim khawp mai. A inbual ngai lova, a rihna a tlahniam nasain a thi neih a mumal tawh lo bawk a. Pathiana rinna a nghah tlatna leh a hriatrengna la neih te chu a at lohna daltu niin dam chhuah a inbeiseina awmchhun a ni. A taksa lamah chuan Cameron chuan thuneihna engkim a nei tawh a, mahse chutah chuan duhtawk lovin a rilru lam thlenga thunun a la tum ta deuh deuh.
Sal anga an inhren atanga thla 8 hnuah chuan Cameron chuan sal inremna chu ziahpui a tum a, dan ang taka a sala a tan theihna tur a ni. Chu inremnaah chuan Colleen chuan dikna chanvo engmah a nei dawn lova, mihring pawh ni tawh lovin hming pawh a nei tawh dawn lova, K tih chauhva koh tur a nih bakah Cameron chu pu, engkima a chunga thuneitu angin a pawm dawn a ni. Colleen chuan inremna hi nasa zawka tihduhdaha vauna avangin a pawm a. Cameron hian an inremna chu Sal lam buaipuitu Company hnenah a ziak fel thlap niin Colleen hi a hrilh a. A tlan chhuak a nih vaih chuan Company chuan rawn umzuiin a chhungte nen an that ngei dawn tiin a sawi thaih thin a. Colleen hian Cameron chu hlauva a en tlat avang leh, Cameron hi mi hneh thei chi a lo nih bawk avangin a thusawi chu a ring thlap nghe nghe a. Tlan chhuah tumna nei lovin kuang tiat bawm tawtah chuan a inkhung a, Cameron-a te khum hnuaiah dah thin a ni.
Hetianga tharum leh thluak sukna hmanga an inenkawl hnuah Colleen chu sal thuawih takah a chhuak zui ta a tih theih awm e. Cameron-a thu anga awm chu amah leh a chhungte himna atan tih tur awmchhun niin a hria a, sal chhinchhiahna atan nghawngkawl awrh chungin in chhung chet vel zawng zawng chu a ti vek thin a ni. Cameron hian Colleen chu a thuhnuaiah a dah pumhlum tawh tih a hria a, pawn chhuah leh sum hailut tura hnathawh te pawh a phalsak a, a tlanbo ngam dawn lo tih a chiang hle. Tum khat phei chu silaia inkhaphlum turin thu a pe fiam a, Colleen hian hlen chhuah mai te pawh a tum hman a ni.
Kum 1981 ah khan Cameron hian Colleen chu a chhungte tlawh a phalsak a, mahse a dinhmun engmah hrilh lo turin a vau thung a. Ina a va haw tum chuan a chhungte chuan ama siamchawp ni awm tak thawmhnaw a ha a, pawisa a nei lo bawk a. A chhungte a biakpawh loh danah sakhaw kal vung bik leh kalsualah a tel ni turah an ngai a, a chunga thil thleng zawh chu amah an hnawh hlatna turah ngaiin engmah an zawt ngam lo a ni. A tukah Cameron nen hian a chhungte chu an tlawh leh a, a bialpa angin a insawi a, a nu leh pate chuan Cameron nen hian thla te pawh an lakdunsak nghe nghe a, Colleen hi hlim hmel puin a nui var mai a ni. Heta tang hian Colleen chu hrui tel miah lo pawhin nghet taka phuar tlat a nihzia a lang chiang hle awm e. Colleen hian Cameron-a duh loh zawnga a awm vaih chuan Company chu an rawn che chhuak dawna ngaihna a neih avangin engmah a sawi chhuak ngam lo hrim hrim a ni.
Kuangah zan lamah chuan hun hmang thin mah se a zalenin hreawm lutuk pawh a tuar ta lova, a nun chu a ziaawm deuh a. Cameron tan lah sal rinawm a neih avangin a duhthusam a hlawhtling ve bawk. Mahse Janice-i erawh a pasal khawsak danah a lungni lo thung, an inremnaah khan a sal nen chuan mipat hmeichhiatna an hmang tur a ni lo tih a tel a, Colleen hian vawi duai lo pawngsual a tawk thung a. Cameron chuan an inremna a bawhchhia nia a ngaih mai bakah he pawikhawihna rapthlak tak maia a tel ve chu inthiam lohna a nei tel a. Cameron-a’n Colleen hi a nupui pahnihna ni tura ruahmanna a siam hnuah Janice hi a pasal lakah hian a hel ta a ni. Colleen-i an hren kum 7-na, Kum 1984 August ni 9-ah khan an Kohhran mite a biakrawn hnuah Janice hian Colleen chu thudik a hrilh ta a, sal inremna kha a lem mai mai a ni a, chutiang bawkin Company chu an awm lo, a ti a, tlan chhuah dan turah ruahmanna a siampui ta nghal a ni.
Colleen-i bus chuanna tur ticket leisakin Red Buff atanga a chhuahna tur pawisa a pe bawk a. A tukah Cameron-a hnathawh laiin in atang chuan a chhuak a, bus station lam a pan ta a. Bus-a a chuan hma hian Cameron chu a be pawp a, a chungah thuneihna engmah a neih tawh loh thu a hrilh a, Cameron hian tap chungin Colleen hi kalbo lo turin a ngen a, mahse Colleen chuan zalenna a thlang ta zawk a, in lam a pan a ni.
Ina a haw hnuah hian a chhungte chu engmah a hrilh chuang lova, police pawh a pun chuang lo. Cameron nen hian phone-in an la inbe zui zel a, Janice-i ngenna angin Cameron hi insiamthatna hun a pe a ni. Mahse thla thum hnuah Janice hian a pasal chu police hnenah a report ta thung a, kum 1976 January ni 31-a bo Marie Elizabeth-i pawh a rukbo tih te a sawi tel a. Mahse Marie hi a ruang hmuh chhuah a nih loh avangin tualthah thubuai chu Cameron-a an awrhtir ta lo thung.
Cameron hi kum 1985 khan man niin Janice chuan a thil tih zawng zawng a puang vek a, Cameron hi kum 104 chhung lung in tang tura tih a ni. Kum 2015 khan a upat tawh avangin tan in atanga chhuah a dil a, phalsak a ni lo thung a. Kum 2020-a hripui leng avangin kum 2021-ah chhuah a ni maithei thung a, Colleen chu hemi chungchangah hian Colifornia sorkar chuan a be rawn tawh bawk. Colleen Stan hian a thil tawn avangin rilru nawm lohna a neih reng bakah a tluang lo zui hle, accounting lamah degree neiin pasal te pawh a nei ve a, reilote hnuah an inthen thung a. A fate pahnih chu tan in lamah te an lut zak zak bawk a, mahse chhel taka thih aia hreawm zawk lo tuar chhuak tawh a ni a, social worker-ah tangin midang tanpui lamah a inhmang a. Janice khan a pasal hming chhawm zui lovin rilru lama buaite puitu social worker-ah bawk a tang zui a. Colleen nen hian California-ah cheng zui mah se an inbepawp tawh lo thung.
