Kum 1992 a ni a. Phillipines khawpui Manila-ah chuan chanchinbu, radio leh TV ah Pepsi fakna, vawiinah millionaire i ni thei tih chu an chhuah chamchi a. Manila michhe venga cheng Victoria Angelo pawhin chu fakna chu a lo hmu ve a, tlai nitin Pepsi chu chawhmeh atan a lei haw ziah a, a chhin hnunglama number chu number vannei a nih theihna atan chhungkuain tawngtaina te an hmang thin.
Victoria hian fa 5 anei a, a pasal Juanito chu rickshaw pu, thirsakawr hnunghnuh neia mi phur kualtu niin ni khatah dollar 4 bawr vel a lalut thin a. Pepsi um khat lei pawh chu an tan thil hautak tham tak a ni. Mahse an vanneih chuan hausak lawihna tham a ni. Heng hunlai hi Philippines economy tlakchhiat hunlai a ni a, sum a vangin an rethei hle. Hausak thut duh chuan PepsiCo in in tur a siam chhuah Pepsi, Mountain Dew leh 7Up te chu a kawng awlsam ber a ni. Philippines-ah hian Coca-Cola chu soft drink lar ber a ni a, an market share chu zaa 75 vel niin Pepsi hian zaa 15 vel chauh an nei a. Pepsi hian elphak tumin theihtawp an chhuah thin.
Kum 1989-ah khan coffee thlaktu angreng deuhvin caffine tamna Pepsi AM an lo tichhuak tawh a, an hlawhtling lo. Hemi kum vek hian pop star Madonna chu rawih an tum leh a, mahse a hla “Like a prayer” chu Kristianna kalh a nih avangin sakhuana thilah an hlawhchham leh a, Pepsi hian sum an seng thlawn nual, Madonna hi dollar maktaduai 5 velin an ruai a ni. Mahse Philippines hi soft drink market-ah khawvela 12-na an ni pha a, an elpui ber Coca Cola nen an inthlau bawk si, bansan thei an ni lova. Kum 1992 ah hian Mexico lama inkhuar DG Consultores chu an ruai a. South America lama hlawhtling thawkhat tawh thil siam chhuah vawrhlarna atan pawhfuh chi khat, Number Fever chu an kalpui ta a ni.
An in tur siam chhuah pathum chhin hnungah chuan number digit thum an dah a, Indonesia Peso 1000 atanga maktaduai 1 thleng man theihna tur a ni. A lawmman pui ber peso maktaduai 1 chu mi pakhat chauhvin an dawng turin an ruahman a, lawmman tesep dang erawh chu nitin a dawngtu an puangzar thin. Lawmman pui ber, peso maktaduai 1, dollar sangli vel hi Philippines-a kut hnathawkte hlawh, ni khata peso 110 atanga chhut phei chuan an kum 23 hnathawh ang vel a ni a, a itawm tham hle. PepsiCo hian he Number Fever atan hian dollar maktaduai 20 vel sen a inhuam a ni.
An in tur siam chhuah vawrhlarna atana an ruahman chu a thawk tha khawp mai. A hausa atanga a rethei berin Pepsi chu an lei ta chur chur mai a, Number Fever an kalpui tirh atanga kar hnih chhung lekin an in tur siam chhuah chu zaa 40 velin an hralh tam nghal a ni. February thla atangin TV-a Channel 2 kaltlangin zantin lawmman dawngtute puanzar thin a ni a, pepsi chhin hum chungin hmun tin maiah lawmman dawngtute chu an ngaithla thap hi a ni ber mai. Number Fever an kalpui zawh meuh chuan he pawhfuhah hian mi maktaduai 31 zet an tel hman a, chu chu an ram mihring zatve zet an ni.
Lawmman pui ber Peso maktaduai 1 dawngtu puan a hun ta. Victoria Angelo leh a chhungte pawhin kum 1992 May ni 25 zanah chuan TV an kil bial thap a, chhiah pek tur tel lova peso dawngtu an puan chuan Victoria chu, “Millionaire kan ni ta” tiin a rawn te chhuak a. A hlim kher mai. A fate hnenah, tunah chuan harsatna awm lovin school in kal tawh ang a, college in zir zo ang, tiin a hrilh a, a pasal pawh lirthei pangngai, eizawnna tur leisak a tiamin in tih tlak deuh te pawh kan nei ve thei tawh ang. Kan thil tawn hi vanram tlafual a ni ringawt alawm le, a ti a, zan pawh a mu phal meuh awm love.
Mahse amah chauh chu hemi zana lawm an ni lo, Pepsi chuan tihsual pawi em em mai an nei a, lawmman dawngtu number 349 chu pakhat chauh siam tur an nih laiin nuai 8 lai mai an lo siam a lo ni a. Lawmman dawngtu chu mi sing tel an awm ta tihna a ni.
A dawngtu number hrim hrim chu computer hmangin an siam a. Manila-ah bithliah zat neiin an print chhuak mai thin a. Mahse computer lam nge a viltute tihfuh loh ni, lawmman pui ber dawngtu tur chu pahnih chiah siam an tum laiin nuai 8 ngawt mai an siam chhuak ta a. Pahnihah chiah hian a lem a ni lo tih fiahna tur special security code a awm a. Mahse chu chu a pawimawh tawh lo, mi singtelin lawmman an dawng angin an inngai nghet vek tawh a, an la pung zel nghe nghe. Result an puan hnuah pawh 349 chuanna chu an la hralh zel avangin lawmman dawngtua inchhal hi mi nuai 4 sing 8 sang 6170 an awm a ni.
Chumi zan la la chuan Pepsi chuan an tihsual chu an hre chhuak nghal a. Zinglam dar 3 velah emergency meeting an ko ta chuk chuk a, engtin nge ni ang tiin an lu a hai hlawm kher mai. Dollar maktaduai 20 seng tura an inruahman laiin mi nuai 4 chuang hnena pawisa an pe chhuak a nih chuan dollar tluklehdingawn 32 vel an chawi a ngai dawn a, tihhlawhtlin theih a ni dawn lo. Chuvangin lawmman pui ber dawngtu tur zawng zawng chu computer tihsual avangin dawngtu ber in awm lova, mahse a thlawn tawp lovin dollar 18 atanga 20 pek an tum ta zawk a, dollar maktaduai 2 pek chhuah an tum laiin dollar maktaduai 20 vel pek an ngai dawn ta tho tho a ni.
Peso maktaduai 1 dawng anga lo inngai tawh Victoria Angelo-i te tana dollar 20 vel chauh mai han dawn leh tak chu satah chhuak pek ang vel a ni ta a. Lungawi taka la an tlem ta hle. Pepsi hian sum leh paia kan harsatna sukiang turin beiseina min pe sauh sauh a, a tiam erawh an hlen chhuak lova, company lian a nih angin an tihsual hi pawm se, a nihdan turin thil kalpui rawh se, an ti a. Mahse Pepsi hian mipui thinrimte duhdan chu tihhlawhtlin theihah a ngai si lova, buaina a chhuak zui ta a ni.
Khawlaiah chuan pepsi chhina number 349 kengin communist hel te, sipai hruaitute atanga thingtlang loneia hnathawk, pheikhawk pawh nei zo lote chu Manila kawtlaiah chuan an chhuak khawm ta a. Pepsi company nena inzawmna nei reng reng chu an bitum ta a ni. An in tur phur kualtu truck driver te chuan kut an tuar a. An truck 37 vel chu tihchhiat a ni bawk a. Khawlaiah Pepsi laka lungawilohna lantirin kawng an zawhin tharum thawhna a chhuak a, intualvuakna a thleng zui a ni ta deuh der a. A che na zualte chuan Pepsi pisa chu puakthei thil tualchher hmangin an vawm a, an thil siam chhuahna hmunte pawh an tichhe nasa hle.
Grenade tualchher pakhat chu truck-ah vawmluh an tum pek a, a per chhuah hnuah a puak ta si a, Manila kawtlaia lo awm zirtirtu pakhat leh hmeichhe naupang kum 5 mi in an thih phah a, mi 6 an hliam bawk a ni.
Pepsi Executive te chuan thaha vauna an tawh reng avangin vengtu an ruai a, an sahimna turin pisa pawh an kai tha ngam lo. An truck khalhtute pawhin silai an ken a ngai hial a. Boruak a sosan a, nawrhna a len tak zel hnuah phei chuan PepsiCo chuan mi pahnih tih loh chu Manila atang hian an thiar chhuak ta vek a ni.
Mipui lungawilote chuan tharum thawhna a reh hnuah pawh Pepsi chu an khing zuiin pawl Coalition 349 te an din ta zel. Pepsi chu an sum pek chhuah tur pe ngei turin an phut a. Mi 689 in civil suit an thehluh laiin mi 5200 velin Pepsi chu inbumna kalpuiah an puhin an khing bawk a. Pepsi executive zingah mi 10 vel chu man tura tih an ni hman bawk a. Mahse Pepsi hian court-a ngenna a siam hnuah man erawh chu an awm lo thung. Pepsi thil siam chhuah hnuatsualna te kalpuiin lungawiloh lantirna kawngzawha lung lam tha lo thi ta te pawh an awm a ni. He buaina hian kum 1993 a kai chho a, December thlaah pawh tharum thawhna hi hriat tur a la awm ta zel a. Chumi karah chuan Pepsi chu firfiaka lungawilohna lantirtute che anga lantir thei tura tharum thawh tur misual ruai angah te puh an ni ta zel bawk.
Zing dar 3-a thutkhawm hmanhmawh an koh khan lawmman dawngtu chu mi sang tam vak lo ni turah an ngai a, mahse mi nuai 4 chuang an lo nih takah an ruahmanna kha a fuh lo sa nghal hrim hrim a. An chet fuh lohna a kaltluang vel vek a tih theih awm e. Kum 1994-ah chuan boruak a dai tawh a, mahse Pepsi chu Philippines-ah hian a lar ta lo khawp mai. Market share zaa 17 bawr vel chauh an nei chhunzawm a, an thil siam chhuah chu an hralh thei mang ta der lo a ni.
