(A ruang ni-a a chanchin an buatsaih lak chhawn a ni)
Vanhlupuii hi Vankhama leh Laldengi te fa laihawl a ni a. Kum 1946 July 2 khan Dawrpui vengah a lo piang a, an unau za hi a piang chhuak zawng chu 14 (Sawmpali) niin tunah chuan 2 (pahnih) chauh an dam tawh.
A pasal Lalthuama S/o Mangthuapa nen kum 14.3.1973 ah inneiin fa pathum
1. Vanlalpari w/o Malsawmtluanga
2. Vanlalremruata
3. Vanzaipuii w/o Vanlalhuma
te an nei a. Tunah chuan Vanzaipuii chauh hi a dam chhun a ni ta mai. Tu te hi 6 (paruk) a nei a, an puitling thuau tawh a.
ZIRNA LAMAH
Tette atangin Helen Lowry School (chutih laia Themthiam zirna sikul) tihah khan a kal a. High sikul chinah chuan kum 1961-1966 Zoram buai thleng kha Govt. Mizo High Schoolah a kal tluan chhuak zak a. Khatih lai khan HSSLC (Higher Secondary and Multipurpose School) tih a ni a, pawl XI thleng a awm a ni. Nimahsela, ram buaiin a nang ta a, matrict (pawl sawm) leh XI kha Mizo High School ah khan a exam theih ta lo va. Shillong-ah chhukin theihtawp chhuahin Shillong-ah tal an exam leh theihna turin khatih laia Shillong-a sawrkar hnathawk hotu lian awm Pu Lalkhama, I.A.S te tanpuina azarah theihtawp chhuahtute zingah tel vein an exam ve thei ta a ni.
Tichuan Mizoram pumpuiah leh Shillong-ah te Examination Centre-te hawn a ni ta a nih kha. Commerce subject hi High School a\angin a la sa a, tichuan hlawhtling takin Shillong atangin B.Com a pass ve ta a. Mizo zinga B.Com hmeichhe pass hmasa ber tia record dah a ni ve ta nghe nghe. He Govt. Mizo High School-ah hian 1979 -80 ah a thawk ve nghe nghe a. Tichuan Pu B. Lalzela, Venghlui nen khan Central High School, Venghlui (tuna College vengaM awm ta khu) an din dun ta bawk.
ZAI (MUSIC) LAMAH :
Vanhlupuii hi mipui hmaa a zai hmasak ber chu kum 1952 khan kum 5 mi lek a la nih laiin a pa Vankhama hruaiin UMFO (United Mizo Freedom Organisation) Zalen Pawl an tih \hin ‘Day’ lawmnaa a zai kha a ni a. Hmun tam takah a pa in dawhkan chungah te din tirin Public inkhawmnaah te a zai ve ta fo mai a ni.
Zai lamah hian zirna fumfe tak chu nei lo mahse a pa kaihhruaina hnuaiah a tette lai atangin zai hi a zir chho a ni ber. Zoram buai hma fe atang tawh khan Theatre Hall-a zai hmasa pawl a ni ve a. Sap hla leh Mizo hla a sa ber a. A unaute leh thiante Pop Group – “The Beginners” tihte nena a sak thin – He thinks I still care, Franky – Connie Francis sakte kha a hit ve \hin khawp mai. Mizo Love Songs hla hlui tha ho kha a sa tam a. Tin, a pa Vankhama hla a sa tam hle bawk a. Radio-ah hian ama sawi danin hla 200 vel a khung.
Shillong-a a lehkha zir lai kha zai lama a tawn san lai ber a nih a rinawm. 1968-69 bawr vel khan “The Agents” group nen inkawpin an zaitu ber pakhatah a tang a. An manager – Rosangliana, P & Sons hovin Upper Assam, Digboi- sapho thingpui huan leh an function lianah hire an ni thin.
Hriat theih mai china zai lama lawmman a dawnna te :
1. 1963 Musical Conference-ah 2nd Prize
2. 1966, 67, 68 – |hal Favang Kut, Shillong – First Prize
3. 1975 and 1976 – Beat Contest-ah a hovin Best Group ve ve
4. 1978 – Jyoty Prasad Agarwal Award for North East Out standing Artiste Award.
5. 1980 – L.G Trophy
6. Lelte Weekly leh Rimawi khawvelin Life Time Achievement Award an pe bawk.
7. Zolentu in ‘Singer of the Century’ nihna an hlan
8. 1999 – AIR, New Delhi in ‘Top Grade Artist’ nihna a pe. North East-ah pathum pek zinga pakhat a ni. Hei hi Mizo zinga pek hmasak ber leh a dang la awm hrih lo a ni. A.I.R thuchhuah angin Audition an neih ngai tawh loh avangin an neih leh ngai tawh loh tur thu an chhuah. Zaipawlah te telin India ramah Calcutta, Digboi, Pune, Delhi, Bombay, Bangalore, Madras ah te mimal zai ang pawhin a tel ve \hin. Seventh Day Adventist General Conference khawmpui lian ber, Utrecht, Holland-ah zai tura sawm a nih angin a fanu Vanlalpari nen an zai a. USA Biak In hrang hrangah pawh zai tura sawmna hmuin Pathian fakna hla a sa hlawm bawk.
45RPM Phonagraph record – mimala siam hmasa ber pawl a ni bawk. Gauhati-ah 1968 velah a record.
KOHHRANAH :
Kum 1971, November thlaa Seventh Day Adventist Kohhrana Baptisma changa a luh atangin Kohhranah a \hatlai zawng zawngin a inhmang. Nihna hrang hrang vuanin Women Ministry lamah pawh hruaitu nihna hun engemaw chen chu a chelh ve nual mai. A dam phawt chuan kohhran khawmpui pawh a hmaih ngai lo. Zai tura ruat a ni ve fo bawk.
Vanhlupuii hi Love songs sa nasa leh a larna bul ni mah sela, kohhrana baptisma changa a luh hnuah vawi khat mah publicah Love song a sa tawh lo, hei hian kohhrana a inpekluh thUk ve zia a tilang. Lay member act ivit ies neihna ‘Zoram Danial Pawl Chhantu’ah hian kum tam tak Treasurer nihna leh Finance Secretary nihna a chelh a, Local Church-ah rei tak Mission Fund Treasurer a ni bawk.
A MIZIA :
Mi zaidam a ni lo va, “Chhakchhuak hmeichhe bak thak” an tih ang chi hi a ni. A duhna lamah chuan a inpawtfan thei fu a. Mi harsa leh a bula harsatna sawite a tlanchhiatsan meuh lo. A neih tawkah a thilphal. A memory a tha a, thil hlui leh rei deuh tawh pawh hre reng thei mi a ni. Mi tawng duh leh titi peih, rualpawl peih tak mi a ni.
Mi inuluk leh inchei nuam ti mi tak a ni a, a thatlai chhung zawng chuan tawp takin a awm khat hle. Tin, hriselna a ngaisang a, ei leh in, zuk leh hmuam lam thilah pawh hian a campaign peih hle.
A NAT DAN :
February ni 22, 2024 khan a chauh deuh thut avangin Ebenezer Hospital-ah luhpui a ni a. Rang takin an lo enkawl nghal a, dialysis te an tih hnu a tuk lamahte chuan a harh ta viau a. A taksa pEng pawimawh (vital organs) pawh a la tha vek an ti a. Mahsela March ni 26, 2024 vel a\ang khan a chau leh ta thut mai a. CT Scan result atangin stroke a nei a ni tih hmuhchhuah a ni a. Engmah a kaah a lem thei ta lo va, biak pawhin tumah a chhang peih ta lo.
Ni 29/3/2024 zingah ICU ah bawk dah luh niin ventilator-te an vuah nghal ta a. A BP engkim a tha viau a, a that leh mai beisei a nih laiin ni 29/3/2024 vek zing dar 2:00 ah thi ta a ni.
