Inneihna hi mi pahnihte pumkhat ni tura an insiamna a ni tih hi khawvel pawmdan a ni. Mahse Uganda-ah erawh chuan inneihna chu hmeichhe pakhat leh mipa 7 te pumkhata an insiamna a ni ve thung. Allman-i hian pawmlai pasal 7 ngawt mai a nei.
He nu hi mi pakhat chu a tling ve reng reng e. Uganda-ah hian mihring c heng zaa 84 chu Kristian sakhaw zuitu an ni a, zaa 14 chu Islam an ni. Allman hi Kristian chu a ni ve na a, a kalsual nasa ngawt ang tih tur ang chi kha a ni. Ka tih tak ang deuhvin thiltihtheihna ropui tak a nei niin a sawi a, mitthi tawh thlaraute chuan an rawn be thin a, chumi hmang chuan mi tihdam theihna a nei a. Kan hmanlai Mizo nuna damlo thawitu bawlpu ang deuh kha a ni ber mai.
Chutah chuan a thiltihtheihna a la tawp mai lo, mitthi tawhte a kaitho thei niin a insawi a. A awmdan chu a thu a awm mang lova, mitthi tawh thlarau, an pi leh pute thusawi ang zelin a awm thin niin a sawi a. Hei hi pasal 7 a neih chhan pawh a ni. Allman-i hian a piantirh atangin a sam a la tan miah lova, a nu pawhin a dam chhung zawng chu a zam a lo zuah ve tawh bawk a. Chu chu a thiltheihna hnar pakhat niin a sawi. Bible kan keu chuan Samsona chakna thuruk chu a piantirh atanga an meh ngai loh a sam kha a ni a, keipawh chutiang tho chu ka ni, a ti. A thiltihtheihna hi a nasa hle a, tumahin min tina thei lova, ka duh lohnaah chuan tumahin min nawr thei lo, tiin a sawi.
Pasal pakhat aia tam neih hi a duhdan a ni bik lova. Thlarau a biak thinten nei tur an rawn tih chuan mak a ti hle a, hun rei tak chhung chu an thu a hnial a. Mahse nasa taka an hrem thin avangin a zawm lo ngam ta lo niin a sawi a. A pasalte hi a rual veka a neih a ni lova, thlarauten an rawn hrilh chuan a neih belh leh mai zel niin a insawi. Thlaraute chuan inlarna min rawn hmuhtir thin a. Pasal ka neih dawn chuan inlarnaah chuan ka pasal tur hmel chu min hmuhtir a. Chumi chu ka va zawngin pasal atan hian ka va sawm ta thin a. Anni chuan lungsi takin min lo nei ve mai zel a. Tumahin min hnar ngai lova, min hnar ngam an la awm hek lo, a ti. Mi 7 in nupui pakhat an intawm hi, a then lo lerh deuhte pawh awm theih tak tur a ni. Mahse Allman chuan ka pasalte hi ka thiltihtheihna hmangin ka phuar khawm vek a, tumahin min phatsanin midang an ngaizawng lovang tih ka chiang, tiin a sawi.
A pasalte nen hian in khatah an cheng tlang lova, a hran theuhvin an cheng a. Allman pawh hian chenpui bik a nei hran lova, a in chu bawlpu hna a thawhna atan hian a hmang pahfawm a. Damlote chuan rawn panin chhampualte nen mitthi tawh thlaraute a bia a, chung mite chuan an natna leh a damdawi te, a enkawl dan turte an rawn hrilh a. Chumi hmang chuan a enkawl veleh thin niin a chhal a. Heng thlarau ka biak thinte hi min thlahtute an ni a, mi tha tak tak vek an ni. Anni hian ka thiltihtheihna chu tihpun zel an duh a, chuvangin pasal pakhat aia tam nei a, fa pawh tam tak nei turin min nawr a. An thu chu ka zawm a ni, a ti.
A pasalte pawh in hrang theuhvah an cheng a. Allman-i hian in a sak sak vek a. An tan chuan a thlawna in neihna a ni nghal a, a remchang fu maithei. Zanin chu ka nupui bulah ka va inthawlh ve kuk teh ang tih erawh chu a remchang lem lo. Nu ber hian ro a rel a, a pasalte hi routine a siamsak thlap a. Pasarih chiah an nih danah hian an nupui bulah chuan kar khatah vawikhat an riak ve tawk dawn tihna a ni a. A hmeichhia zawk hian an inah a pan chilh mai thin. Ka pasal zingah hian vui an awm ngai lova, an lung a awi em em. Thlaraute min hrilh angin ka pasal 6 te atangin fa paruk ka nei tawh bawk, tiin Allmen chuan a sawi a. A thiltihtheihna avang hian a danglam e tih lovah chuan mi pangngai mai a nih thu te a tarlang tel bawk.
A pasal zinga pakhat chuan Allman-i hi tihdam hnathawk thin a nih avangin kan zah em em a, thiltihtheihna avangin kan hlau tel bawk. Kan inneih dawn hian chhungkaw din turin ka kum a tam ve tawh a, ni khat chu min rawn phone a, a ina kal turin min rawn hrilh a. Ka va thlen chuan pasal atana min rawn sawm chuan lawm takin ka lo pawm nghal mai. Midang 6 nena nupui intawm chu a tirah chuan thil danglam tak a ni a, ka nupui nen hian kan inhmangaih nghal lem lo bawk. Mahse kan tan a tha em em a, engkim min tihsak a, chuvangin kan zah lehzual a, a chhungkuaa ka tel ve hi vannei ka intiin tunah chuan ka hmangaih hle tawh a. A pasalte inkarah hian inthikna a awm miah lo, a ti.
A pasalte hian a duat pawh an duat narawh a, lal ber ang maiin an cheibawl. Ke-a a kal an phal ngai lova, a zawnna tur hlang siamin chumi hmang chuan an zawn thin a, kea kaltir pawh an phal ngai lo. Khawlum avanga a thlan a tlak loh nan a chhiahhlawhten an zap deuh reng. A pasalte hi duhsak bik leh thlei bik nei lem lovin a enkawl thiam riau. Eitur leh in tur a inzatin a sem vek a, hmangaihna leh duhsakna chu semzai thiam tak a ni, zei ve khawp mai.
Mipa a ruala nupui pakhat aia tam nei hi chu sawi tur an awm nual. Muslim hovin an ching lehzual. Hmeichhia pasal pakhat aia tam nei hi tlanglawn lo zawk mah se sawi tur erawh chu a awm ve nawk mai. Nigeria-ah khuan hnam thenkhat chuan pasal pakhat aia tam neih hi an hnam ziarangah an nei a, chu hnam chu Irigwe te niin an ram hmarlamah an cheng a. Hmeichhia chuan an duh chuan pasal pakhat aia tam an neih a thiang a, a luck deuhvin an ngah deuh a, chhe ve deuh tan chuan a harsa lam hret te pawh a ni maithei. Hetianga an kal fe hnuah kum 1968 ah khan pasal pakhat aia tam neih a, in khata chen chu danin a rawn khap ta a. Mahse hmeichhiate hian la nei chhunzawm zel thovin Allman-i ang deuh hian an pasalte chu in hrangah an cheng a, an va pan mai zel. Fa an neih chuan an pasalten an enkawl thin a, hei hi chu ka i pasal dang fa zawk a va ang ve tih changte pawh an nei ta thin awm e.
India kan bang leh ta lo. Hmar lam, Paharis hnam leh Himachal Pradesh-a Kinnuar hnamte chuan he kalphung hi an la zawm ve zel. Paharis hnamte hi Hindu thawnthua Pachi Padavas thlahte nia sawi thin a ni. An thlahtu unau 5 te chun Lal Panchala fanu Draupadi-i chu nupui atan an nei a, chu chu an hnam kalphungah hian an la chhawm zui ta zel a ni. Heng hnam bakah hian Nilgris-a cheng Toda hnam te, Travancore-a mi Najanad Vellala hnamt leh India chhim lama Nair te chuan pasal pakhat leh thingphur khat tih hi an kalpui ve lo. Pasal pakhat aia tam neih chu an kalphungah an nei.
Kum 2013-ah khan Kenya-a mipa pahnih chuan inremna an ziak a, nupui intawm an remti. Heng mi pahnih Sylvester leh Elijah te hi an nupui, a hming an puanzar loh, nuthlawi fa nei tawh chu kum li chhung an lo ngaizawng tawh a. Neih zawk tur a hriat theih loh avangin a mipa lam hi an inremsiam ta ringawt mai. An pahnih hian nupui hi an luhkhung a, fa a nei a nih chuan pa nihna chu intawm a, enkawl ve ve an lo tum tawh bawk a. Inthik lem lovin an pathum hian an khawsa thei a. An nupui fa hmasate pahnih hian pa tia koh tur pahnih ngawt mai an nei chu dangdai duh tak tur a ni.
He inneihna hi Kenya dan chuan khap lo mah se a phal chiah lova. Sorkar chuan in hnam danin hmeichhia, pasal pakhat aia tam pawm hi a phal a nih chuan kan remti thei ang, chuti a nih loh chuan in inneihna hi kan pawmpui thei lo. Hmeichhe zingah pasal pahnih neih tum talh an awm phah ang e, an ti.
Tibet leh Nepal lamah thung chuan hmeichhia, pasal pakhat aia tam neih hi mi rethei zawkte-ah a hluar a. Fa enkawl seilen kawngah pa pakhat aia tam an neih chuan an inchhawk theih dawn vang a ni a. Unau zingah nupui intawm sawi tur an awm nual. A mipa lam tan pawh hei hi a remchang fu mai, lo neia eizawng an ni deuh tlangpui a, ro insem kawngah an ram insem tur a tlem phei chuan chhungkua an intawm tawh avangin sem hranpa a ngai lova, an intawm nghal thek thei.
South America-ah chuan Amazon vela cheng hnamte hian he kalphung hi an uar a, hnam awm zaa 70 vel chuan pasal pakhat aia tam neih hi an pawmin kalphungah an nei a. Chung zingah chuan Bororo hnam chu a langsar ber pawl an ni.
