He beihpuithlak hi a ruahmanna chu a tha ngang mai a, chiri deuh angin lang mah se kil hrang hrang atanga thlirin an hlawhtlin a rinawm hle. An bitum chu Khaled Mash’al a ni a, Hamas Political Bureau-a an hruaitupa, kum 40-a upa, computer engineer a ni a. Hamas-ah hian a kaisang chak hle.
Kum 1993-a Israel leh PLO ten inremna an neih hnuah khan sakhuana nena politics rawn khel a, firfiak anga che zui ta Hamas te hi Israel tan chuan an lian chak hle a, ngaimawh tham tak pawh an ni. Kum 1997 July ni 30 khan Jerusalem-ah firfiakin an che a, mi pahnih chuan thih chilhin mipui punkhawmna puakthei thil an tipuak a, mi 16 an thih bakah mi 169 in hliam an tuar a, hei vang hian Mash’al chu thah tura bitum tan a ni.
An Prime Minister Benjamin Netanyahu chuan he thil thleng avang hian thutkhawm hmanhmawh a ko ta nghal a, Hamas hruaitu a tu emaw ber kan phil a, an chak zel tur kan hmeh mih a ngai a ni, tiin thupek a tichhuak a. Hetiang lai hian Mossad hotu, an ramsad chu General Danny Yatom a ni a, kum 1996 atangin he hna hi chelh tanin an tihhlum tur lo thlang fel tura ruat a ni zui ta nghal.
Yatom hi sipaia hming tha tak mai a ni a, Yitzhak Rabin-a hnuaiah khan military secretary hna te pawh a lo chelh tawh a. A thih hnuah Mossad a kaihruai zui leh ta a, sipai leh hruaitu tha tak chu ni mah se an intelligence leh a rawlrala che thin Mossad han kaihhruai tur em chuan mi tam takin an sit thung a, Rabin-a thihna hriatrengna atana he hna hi chelh ve theiah mi thenkhat chuan an ngai nghe nghe.
Kum 1997 August thlaah Yatom chuan Mossad hmunpui, Tel Aviv-ah inhmuhkhawm kovin a hote chu tunge kan bitum dawn tih chungchang a sawipui ta a. Mahse an bitum theih tur ang an hmu chhuak thei mai lo. A chhan chu Hamas hruaitute chu an vaiin an hmelhriat vek lova, a challang ber Mousa Marzook lah chu American khua leh tui nihna nei a nih avangin, an that a nih chuan US pawi an sawi thei dawn. An ngaihtuah fe hnuah Khaled Mash’al chu bitum atan an thlang ta a, ani pawh bitum awlsam a ni dawn lo, Jordan-a Amman-ah pisa a nei a, chutah chuan a cheng.
Kum 1994 ah khan Israel leh Jordan te hian inremna an nei a, Rabin-a chuan Mossad te chu Jordan ram chhunga chet a khuahkhirh nghal hmiah. Hei hi General Yatom pawhin hun rei tak chhung chu a secretary a lo nih tawhna angin a lo zawm ve tawh thin. Mahse Ramsad a nih hnuah erawh chuan Jordan-a chet chu a remti ta a, Netanyahu-a hnenah Mash’al chu an bitum a nih thu a va hrilh ta a.
Netanyahu chuan a lo remti a. Mahse Jordan nena thubuai hla buai an neih lohna turin a bengchheng lo thei ang bera kalpui turin a ti thung. Prime Minister-in a remtih hnu hian Yatom chuan che chhuak turin Caesarea-a sipai tha chungchang Kidon group te chu he hna hlen chhuak tur hian thupek a tichhuak zui veleh ta bawk a. Chetdan tur an rel fe hnuah tur hmanga Mash’al-a beih chu a remchang ber dawnin an hre ta a ni.
Israel hian tur leh thil dang zirchianna chu Ness Ziona-a Biology Institute-ah an nei a, scientist te chuan tur tha zet mai an siam chhuak a. Far hnih khat lek pawhin mihring a that thei a, an vuna deh tawh hrim hrim chuan hna a thawk thei ta vek lehnghal. Chu tur chu taksaah hmuh a har hle a, lungphu chawl avanga thi angin an lang deuh mai thin. Jordan-ah silai leh puakthei thil va chelek a remchang dawn lova, he tur an lo siamchhuak hi chu an tam chuan a remchang hle awm e. Tur hmanga chetlak dan tur chu an duang zui leh ta.
Kum 1997 nipui lai a ni a, Tel Aviv kawtthlerah chuan mi pahnih hian coca cola um hi an rawn thingin an rawn phuh kual a, an bula mite tan chuan tlangval hawklak awm ngaihna hre lo ni awm tak tur an ni. Mahse chung mi pahnihte chu Mossad mi leh sate an ni a, Mash’al that tura an inbuatsaihna a ni a. An tum dan chuan pakhatin coca cola chu a phuhin Mash’al-a mit lak pen a tum ang a, a inrin loh laiin pakhatin turin a nghawng hnung lamah a lo phuh thung ang.
Kar ruk chhung an inbuatsaih leh a, Jordan rama an luhdan tur leh an chhuah leh dan tur zawng zawng an duang fel tawh a. Hetihlai hian agent thenkhat chu a hmahruai atan Jordan-ah hian ram dang passport nen an thlak lut a. Mash’al-a enthlak hna an lo va thawk a. Engtikah nge in a chhuahsan a, tuin nge a lirthei khalh tih te, in atangin a pisa chu khawi kawngah nge a pan thin? Traffic a tawtin khawiah nge an hel thin tih te. In atanga a chhuah a, a lirthei a thlen hmain minute engzat nge ral thin, a pisa a luh hmain eng nge a tih kawi hmasa thin. Heng zawng zawng hi chipchiar takin an lo va thlithlai.
An hmuh chhuah chu Mash’al hian zingah amah vengtute tel lovin a pisa, Hamas ho hmunpui Palestinian Relief Bureau chu a pan thin a, a assistant-in lirthei a khalh thin. A pisa thlen hma hret hian a chhuk a, lirthei chu driver-in khalh tlangin thui lote kein a kal zui thin tih hi a ni a. Kan bei dawn a nih chuan lirtheia a chhuk hnuah kawngsir kea kalnaa lo beih chu a fuh ber ang tih chu an thutlukna a ni.
Enthlak hnathawktute hi agent dangin an rawn belhchhah veleh a, an tawmbuk tur leh lirthei hman turte an rawn ngaihtuah a. Mahse September ni 4 ah khan Hamas te chuan Jerusalem an bei leh a, thihchilh mi pathumte chetna avangin Israel mi 5 an thi a, mi 181 an hliam bawk a. Chuvangin Mossad chuan kan inpeih thawkhat tawh bawk a, i che ve tawh ang tiin Amman khawpui lam chu an hawi ta a ni.
Kum 1997 September ni 24 ah agent te chu an awmna turah an awm kim tawh. Amman-a hotel lian ber swimming pool bulah chuan mi pakhat hi chauh hmel takin a thu a, hmeichhe pakhatin a vil deuh chawt. Hotel-a thawkte a hrilh dan chuan lung natna atanga dam chhuak leh a ni a, a taksa a la chau hle. Hmeichhia chu doctor niin a marphu leh a BP a endiksak deuh reng bawk a, an pahnih chuan swimming pool bul chu an hun hman tamna ber a ni.
Chu damlo chu Mishka Ben-David a ni a, Mossad agent, an hmunpui leh Jordan-a che turte inbiakpawhna lam viltu ber niin hmeichhia pawh Mossad agent, doctor tak tak a ni ve bawk a. Ani hian tur thahna tur hlo chu a keng a. Mash’al-a thattu tur mi pahnihte khan tur lo kai palh ta se, an thih ve lohna tura lo buaipuitu tur a ni a,. Tur an kai palh a nih chuan a thahna hlo chauh chu dama an chhuah theihna tur awmchhun a ni.
Kidon agent pahnih te pawh Amman-ah chuan Canada khua leh tui ang inchhalin an rawn lut a. Intercontinental Hotel-ah Shawn Kendall leh Barry Beads tiin an rawn inziak lut. An pahnih hian Arab rama a ruka chet la thawh ngai miah lo an ni a. Canada khua leh tui anga an lut hi a fuh lo ta hrim hrim bawk, sap tawng an thiam na lova, Juda aw phawi an la nei bawk. Man ni ta se chhui chhuah an harsa dawn lo. Heng an ngaihtuah hmaihte hi a hnuah a pawi zui ta chat reng a ni.
Mash’al-a beihna atan chuan a pisa, Shamia Center building bul an thlang fel tawh a. Minute reilote chhungin an hna chu zawhfel mai theih tur niin a lang. An pahnih hian Mash’al-a kea kal chu an va pan ang a, turin an phuh hnuah an bula lirthei hmangin an tlanchhe tawh mai dawn a. Coca Cola khan pakhat zawkin Mash’al-a hmaiah a phuh dawn a, mahse heta hian tur a awm dawn lova, an chhaih buaina tur a ni. An buai lai takin pakhat chuan tur chuan a nghawng hnunglamah a phuh ang a, reilote hnuah Hamas hruaitu chu lungphu chawl avangin a thi tawh mai dawn.
Agent pahnih hian puih an mamawh takin tiin building chhungah khualzin lemchang agent mipa leh hmeichhiate chu inring rengin an lo awm dawn a. Mash’al kha a kal chak lutuk a, amah thattu turte hian an nang hman dawn lo a nih chuan heng agent dangte hian an lo pawt khawtlai ve dawn a. An tum anga thil a kal a nih chuan Hamas hruaitu an dahtha ang a, Israel leh Jordan-in buaina an nei lo bawk ang.
Mahse an hlawhtlin thei lohna siam thei tur a awm a. Mash’al hian amah vengtu a rawn hruai emaw, a bula an chhungte, police officer leh Hamas mi leh sa an awm chuan thil kalsual vek thei a ni a. Chuvangin agent che chhuak tur mi 8 te chu an chetna tibahlalh thei tur a awm chuan kaltlangpui lo tura hrilh an ni a. A remchan lohna a awm chuan ni danga hlen chhuah mai turah an dah a. An chet hun tura an ruat pawh police lo awm vang te, Mash’al-an vengtu a neih vangte leh pisa a kai loh avangtea thulh loh theih loh chang an nei ta ngei bawk.
September ni 25 a rawn inher chhuak a. An beihpuithlak viltu tur ber chu office building hmaah chuan a ding a, thupetu tur ber a nih angin agent dangte chu a zai ngaiin an che chhuak dawn a. Inbiakna atan hian phone leh radio hmang lovin zaizir an hmang. An hotupa hian beihpuithlak chu kalpui tlang loh tur a tih chuan a lukhum chu a phawk mai dawn a ni.
Building hnungah chuan an tlanchhiatna tur lirthei a ding a, agent pahnihte chu a lo nghak a. Shawn leh Barry te chu building luhna bulah an awm ve thung. Che chhuak turin an inpeih tawh.
An bitum Mash’al erawh in atangin a rawn chhuak dawn chauh a la ni. A rawn chhuah hmain a nupui chuan a fate pahnih chu school-a dah turin a rawn ti a, ni dangah chuan a nupui hian a thlah thlap thin. A fate lirtheiah an chuang ve tih chu Mossad enthlatute chuan an lo hmuh hmaih a, lirthei darthlalang chu an tihdum vek avangin hmuh theih a ni lo. Kidon agent te hnenah chuan a rawn inkhalh chhuah thu an va hrilh ta nghal zat bawk a.
Mash’al chu Shamia Center a rawn thleng a, lirthei atanga chhukin kein a kal a. Building thlen dawn kailawn a zawh tan. Agent pahnih chuan an lo nghak reng tawh. Mahse an beisei loh tak maiin lirthei atang chuan hmeichhe naupang pakhat hi a rawn tlan chhuak a, “Pa” a rawn ti a. Lirthei khalhtu chuan hmeichhe naupang chu a rawn umzui a. Amah thah tumnaa an hotupa chuan naupang a hmuh tur chuan a lukhum a phawk a, agent pahnih chu che chhuak lo tura va hrilh a tum. Mahse agent te hian a signal chu an lo hmu tlat lova, a hnunga hmeichhe naupang leh lirthei khalhtu pawh an hmu hek lo. An ruahmanna ang chuan an che zui ta a ni.
Mash’al lam chu an pan a, Shawn chuan coca cola chu thingin phuh a tum a, mahse a inchhinna chu a hawng thei ta tlat lova, Mash’al-a chhaih buai an tumna a tlawlh. Barry chuan tur a rawn lek chhuak a, Mash’al-a nghawngah chuan va phuh a tum a. A hnunga lirthei khalhtu chuan lo hmuin vih a tum niin a ngai a, a va au ta chiam mai a, hmanhmawh takin Barry-a lam chu a rawn pan nghal bawk. Mash’al chuan a driver au chu hriain a lehhawi a, Barry chuan tur chu a phuh ta chiah a, Mash’al-a bengah tlem a thawi a, a thip zekah chuan a ngaih tha lovin a tlanchhe zui ta nghal a. Shawn leh Barry te chuan lirthei lam an pan zui ta nghal a. An buai chhung hi minute 1 bawr vel chauh a ni.
Agent te vanduai ai a ni ang chu Hamas sipai pakhat Muhammad Seif chu document thehlut turin pisa-ah hemi zing hian a rawn chuangkai ve chiah a. An buaina a rawn hmuh rualin Shawn leh Barry te tlanchhe tur chu a umzui nghal a. Shawn hi nang hman a, mahse Barry chuan lo chhanin an tlanchhiatsan thei hram.
An tlanchhuak chu he beihpuithlaka an tihsual pawi ber mai an va ti leh ta nghal a. An tlanchhiatna lirthei khalhtu chuan Seif-a khan a number a ziak lai a hmuh thu a sawi a, Shaw leh Barry te chuan man theih dinhmunah an ding tih hriain chu lirthei chuan Hotel an pan ngam tawh lova, hmun him dang hre hek lo le, an chhuk a, kein hotel lam chu an pan ta a.
Mahse Seif-a kha sipaia lo tang hrep tawh. Afghan-ah pawh lo che tlat tawh thin a ni a, chung mi pahnihte chu chhuah a lo tum hauh lo mai a lo ni a. An lirthei chu a chak thei ang berin kein a rawn umzui a. Shawn leh Barry te lirthei atanga an chhuk chu hmuin a rawn pan hnai a. Barry zawk chu a rawn bawh a, heng mite hian Mash’al-a tihnat an tum tiin a au chiam a. An inchai buaina hmutute an rawn pungkhawm a, police officer pawh a rawn thleng chhunzawm ta nghal. Insual chu thelhin taxi hmangin an pathum chuan police station lam a panpui a, Seif-a chu agent pahnihte chuan an lo khawih nasa hman ngang mai.
A tirah chuan Seif-a zawk hian ram dang mi pahnih chu a tibuai hmasa niin police te chuan an ngai a. Mahse Seif hian thil awmdan a sawi takah chuan chung ram dang mi pahnihte chu chhuichian an ni a. An passport atangin Canada mi an nih angin embassy an va be pawp a. Mahse a lo chhangtu chuan heng mite hi ka hre ngai lova, Canada mi an ni lo tih erawh ka chiang, a rawn ti ta mai a.
Israel mi leh sa an ni tih chu hre ngat se chuan boruak a sosang nghal viau awm e. An hriat hma hian phone hman an phalsak ta lehnghal a. Europe-a Mossad mi leh sa va be pawpin man an nih thu an va hrilh a. Agent dangte report rawn lut khawm nen, inbiakpawhna lam viltu Mishka Ben David tan pawh thil a kalsual tih hai rual a ni lo.
A rang thei ang bera Jordan an chhuahsan dan tur an dap ta nghal a. Mahse buaina hlir a ni ta mai. Mishka chuan ramsad a be pawp a, Amman-a Israel embassy-ah inhumhimna lo zawng turin a chah a, an chhuahna tura an ruahman chu hman ngam a ni tawh lo. Doctor tih lo agent thawk chhuak dang zawng chuan embassy an pan zui ta a ni.
Tura an phuh thawi Mash’al-a dinhmun erawh hetiang lai hian a tha lo zel. Ni khaw hre lovin a tlu a, damdawi inah dahluh a ni tawh a. Tur thahna an pe a nih loh chuan darkar reilote hnuah a thi ngei dawn.
Beihpuithlak kalsual chu Judate kumthar lawmnaa tel an Prime Minister Benjamin Netanyahu beng a thleng veleh a. Ramsad Yatom chu Jordan-a thlawk lut a, an ram hruaitu King Hussein va hmu a, thil awmdan zawng zawng dawt tel lova va hrilh turin a ti a. Prime Minister hian King Hussein hi biain ramsad a tirh thu a hrilh nghal bawk a. Mahse eng thilah nge a tirh tih erawh a sawi duh lo thung.
Hetiang boruak rit tak hian Netanyahu leh minister te chu a deng keh sawm hneh hle a. Jordan thil phut ang ang chu tihhlawhtlin vek pawh an duh hial a. An agent te him taka an chhuah theihna tur a nih chuan thah an tum ber Mash’al chu chhanhim pawh an pawiti lo.
Yatom leh King Hussein te chu an inbe ta a, a thu hriat chuan King Hussein chu a thawng kher mai. Mash’al-a dinhmun a tha lo zel tih a hriat hnuah chuan lal chhungkaw damdawi inah a lak pheitir a, a nunna chhanna atana tur thahna pek a, mi tang chhuah chu a remti ta bawk a. Israel chu a hmelma lian ber nunna chhan tumin a phili buai ta vat vat mai a ni.
Tur thahna damdawi chu Mishka kuta a awm tawh a, a hnua a sawi leh danin tihchhiat a tum hman. Kan agent zingah he damdawi mamawh hi an awm lova, ka kawl lai an man a nih chuan ka chungthu a rit dawn lutuk tiin hotel-ah tihchhiat a tum a. Mahse Israel atangin phone call a dawng a, tur thahna an la kawl leh kawl loh a rawn zawt a, an kawl thu a hrilh hnuah Jordan sipaite kuta hlan tur an rawn ti a. Hotel luh kaah Jordan sipaite chuan an lo nghak thap tawh zawk a lo ni a, a damdawi nen chuan damdawi in lam chu rang takin an pan zui ta.
Buaina dang la awm leh chu a chiutu tur doctor khan ramsad remtihna tel lo chuan hma a la duh leh ta tlat lova. Yatom chu embassy a pan lai va be pawpin thu a rawn pe a. Damdawi inah chiu turin a va kal veleh ta a. Mahse Jordan thuneitute chuan a chiu an lo phal awzawng lo, an hna a rawn hlen chhuak mai mai zawk ang, an lo ti.
Damdawi ina an doctor hotu ber leh Mash’al-a enkawltu ber chuan damdawi bawlhlo leh a tur siamna chemical formula an hre lo a nih chuan chiu ngawt a lo duh bik der lo mai a. Mash’al-a thihnaah hian inhnamhnawih ka duh lo, a lo ti bur mai.
A hma lawka tang tlang titih Israel leh Jordan chu an buai leh ta, Jordan hian tur an siamdan an zawt a, Israel-in an hrilh duh bawk si lo.
Mashal-a dinhmun chu a chhe zel a, khawl hmangin a la thaw ve hram hram a ni ber tawh. A thi a nih viah chuan ram pahnihte inkara inremna derdep tak mai chu a che ve dawn tih lah chu a chiang reng. Jordan lal chuan Israel embassy chu luh chhuak a, agent pali birute man turin sipai a khawm tawh a, Israel nena an inkungkaihna zawng zawng chhut chah vek a tum bawk.
Mashal-a thih thu an puan rualin agent pahnih an mante chu an thi ve ngei dawn tih a chiang bawk a. Boruak duhawm lo zawk a thlen lohna turin Jordan lal hian US President Bill Clinton chu a zuk be pawp ta nghe nghe.
America hian Israel chu Jordan hnena tur an siamdan hrilh turin a rawn kar ta a. Netanyahu-a tan duhthlan a harsa ta hle. An hrilh a nih chuan an ram thuruk chu hmelma kutah an hlan tihna tluk a ni a, an hrilh loh erawh chuan a sawhkhawk a na dawn lutuk. A minister leh adviser te, eptu hruaitute a biak rawn hnuah tur siamnaa an bawlhhlo hmante chu Jordan hnenah an hrilh ta a ni.
Jordan doctor te chuan a siamdan an hriat takah chuan a thahna damdawi chu an hmang ngam ta a. Chu damdawi hmanga an han chiu chu Mashal chu a rawn tha chak hle, a thaw pawh awm mumal tawh lo kha kar lovah a mit a rawng meng thei ta a.
Mashal-a chu a rawn harh leh tih an hriat chuan Isrel chu lawmin an zuang lo chauh, Jordan-a an hmelma thi tur rawn dam leh chu an mi pawimawh chanchin ang maiin an lo lawm a ni.
Mishka leh doctor te khan Jordan an chhuahsan nghal a. Agent pali, Embassy-a birute leh police in kawl pahnihte chu hren zui an la ni. Israel hian an Prime Minister bakah Foreign Affairs minister leh defence minister te chu Jordan-ah hian inbiakna nei turin a tir a. Mahse Jordan lal chuan a lo hmu lova, a unaupa Hassan-a zawkin a lo dawngsawng a ni.
An palai tirin awmzia a neih tak lovah chuan deputy ramsad hlui, King Hussein-a thian Efraim Halevy chu palai hna thawk turin an ruat veleh a. Brussels-a European Union-a Israel ambassador a ni. Jordan-ah hian thlawk lutin King Hussein-a chu a zuk hmu a, Israel mi pali, embassy-a awmte chhuah zalen nan Hamas hruaitu Sheikh Ahmed Yassin chu inthlengpui a rawt a, Jordan lal hian a lo remti thei hram a. Agent pali chu an chhuah phawt.
Police te man Shawn leh Barry te kha chhuah an la ngai. Chumi tur chuan Israel-in a man Jordan mi tang 20 te chhuah chu Israel Foreign Affairs Minister Ariel Sharon chuan a rawt leh a. Jordan hian remti zet mah se a sasehah a aia tam chhuah a rawn ngiat a.
Ariel Sharon-a ngaihdan a ni ta lo. Jordan lal leh an ram palaite chu a ankhum ta a, In duh leh mi pahnih chu la kawl rawh u. Kan ram atanga tui inlakna hi kan tichhia ang a, Mashal hi kan that nawn leh ngat bawk ang, a ti ta a.
A hnua an Prime Minister ni zui ta, Israel sipai din kawnga a tha thawhtu, an indona hmingthanga hnehna chanpuitu Ariel Sharon-a inhrosakna chu thil thleng thei a ni tih hriain Jordan chuan kar zui chi a ni lo tih an hria a. Helicopter pahnih rawn tir rawh u, an ti ta a. Helicopter pakhat chuan agent pahnih chu Israel-ah a phur haw a, pakhat chuan Sheikh Yassin chu Jordan-ah a dah ve thung.
Hemi tuma Mossad chetna hian dem a hlawh hle a, Israel sorkar chuan chhui chianna a nei ta nghe nghe a. Thil kalsual chu ramsad thiam lovah an puh ta ber a, agent te chuan Yatom chu an sawisel nasa kher mai.
Khaled Mash’al-a an thah tak loh hnuah hian Hamas hruaitu challang tak a ni a a. Sheikh Yassin-a thih hnuah phei chuan an hruaitu lu ber a ni a. Israel tan chuan mitmim ang mai a ni zui ta zel.
Yatom hi he thil thleng avang hian a bang mai lova, mahse kum 1998-a Mossad chetna kalsual avangin a bang ta nge nge a, Jordan lal hmintu Efraim Halevy chuan ramsad hna a rawn chelh veleh ta a ni.
