Thil inhmeh lo tak chu kum upate leh pawikhawihna a ni. Kum 60 ral kai tawhte chu uaithla lam an nih tawh bakah an thluak a lo dai tawh bawk a, khua leh tui tha ni tura ngaih an ni. An vanglaia misual tawrawt tak mai, dam chhunga lung in tang tura an chungthu relsak tawhte pawh kum 70 ral an kai chuan tan in atanga chhuah zalen ngam khawpin an nem tawh thin. Kum 2015 April thlaa London lunghlu dahkhawmna hmunpui Hatton Garden Safe Deposit Company atanga lunghlu leh lung mantam dang rawkna, British-a inrawkna lian berah pawh khan mifing leh training nei chhuak, Navy Seal hluite emaw, ram danga rukrukna kalpui tura misual insawmkhawmna lo thleng tawh thinte sulhnu ni turah an ngai a. Tumahin kum 60 chuang tawh, sual lama pension tawhte chetna a nih an ring pha lo reng reng.
An rawk Hatton Garden Safety Deposit company hi kum 1940 chhovah khan din a ni a, mi hausa leh lunghlu lama sumdawng company te chuan an thil hlu an lo dahkhawm tawh thin a. An hawn tirh atang hian misualte chuan hausakna tamna lai a ni tih hriain a lo bitum fo tawh thin a. Mipui rin loh khawpa rawkna erawh an la tawk ngai lo. Mahse kum 2015-ah khan mi 5 te ruahmanna fel famkim tak maiin an venhimna sadai chu an rawn thiahsak ta a.
Chung zinga pakhat, a bultumtu ber chu Brian Reader-a a ni. Kum 76 mi niin rukruk lamah sulhnu a ngah tawh khawp mai. Kum 11 a nihin mi in rawkna avangin man tan a ni tawh a. Kum 1970 chhovah khan mi rawk lama misual pawl, Millionaire Moles an tih zingah telin London-a Lloyds bank chu hlawhtling takin an rawk a. Dollar maktaduai 59 hu pawisa leh thil hlu dang an hum chhuak a. Kan pawikhawihna hi Sherlock Holmes-a chinfeltir rawh u tih lehkha an hnutchhiah a ni. Kum 1983 ah khan Heathrow Airport-a chhek in an rawknaah a tel leh a, dollar maktaduai 4 vel pawisa lak chhuah an tum laiin dollar maktaduai 145 man hu rangkachak an hmu fuh a. Rangkachak thiar chhuaktu niin an khawih danglam hnuah Hatton Garden-ah hian a dahlut nghe nghe a. Police pakhat thihna atanga chhui chhuah niin he thubuaiah hian fihlim mah se chhek in an rawknaah hian kum 9 chhung lung in tang tura tih a ni a.
Kum 1994-ah khan tan in atang chhuakin rukruk hna chu a chawlhsan tawh niin a lang a, tan in atang hian hmin sa diamin a rawn chhuak a ni. Thangkhat lian a liam a, cancer leh natna dangin a tlakbuak ta a. Inenkawlna atan pawisa a mamawh a ni chek ang chu, lunghlua sumdawnna lam inziahna chanchinbu leh magazine te chu a zirchiang leh ta a. Lunghlu kaihhnawih thil reng reng chu a hre hneh hle. Sumdawnna lam buaipui a tum lova, lunghlu dahkhawmna, London-a hmun him ber tura ngaiha luh a, lunghlu lak chhuah a tum zawk a. A bultumtu ber a ni chiah em tih chu finfiah theih ni lo mah se Scotland Yard lam chuan, engkim ruahman a, a thurualpui turte pawh sawmkhawmtu a ni tih hi kan hriat dan a ni, an ti.
A pahnihna chu Terry Perkins-a, kum 67 mi a ni. Zunthlum vei leh hrisel vak tawh lo a ni nen, a chenna Enfield-ah chuan a thawm a zawiin an thenawmte chuan ina a awm leh awm loh pawh an hre ngai kher awm love. Mahse British-a pawisa fai ruk chhuahna lian berte zinga mi kum 1983-a Security Express Job rawknaa an hruaitupa ber kha a ni a, khami tum khan dollar maktaduai 9 vel an ru chhuak thei a. Man a nih hnuah kum 22 chhung lung in tang tura tih niin Spring Hill tan inah kum 17 chhung an dah a, an chhuah zalen hnuah bank rawkna leh hnathawk pakhat kut an thlak avangin kum 2012 ah khan rei vak lo chhung chu tan inah hian a lut leh a, a chungthu ngaihtuahtu judge phei chuan Perkins hi misual, pawisak nei lo tak tiin a hrilhfiah nghe nghe.
A pathumna chu Danny Jones-a, kum 60-a upa, rukruk nuam ti em em mai leh a upat tawh ngaihtuah a thahrui ngah tak mai a ni a. Tan inah kum 20 chhung khung a ni ve tawh bawk a, a zalen chuan marathon tlan tih bawr vel te chu chhun lamah a buaipui thin a. Tlai dar 5-ah inah inkalhkhumin pawikhawihna lam a zir thin. Internet atanga lehkhabu leh movie te chu a thulakna an ni deuh ber a. Hatton Garden an rawk hma kum thum chhung chu rangkachak leh lunghlu man chungchang a buaipui tel bawk a ni.
A palina chu Carl Wood-a a ni a, kum 58 mi niin kum 2002 khan midang kutthlakna avangin kum li chhung tan inah khung a ni a. A chhuah hnuah hnathawh em em a nei lo, rawnghnawih leh in cheithat tih bawr velah a inhlawh ve thin a. Hatton Garden an luhchilh hma hian leiba dollar 12000 bawr vel a nei hman a, a sum lakluhna ber chu a natna benvawn avanga rualbanlo pension chu a ni deuh ber awm e.
A 5-na, driver leh thlithlaitu atana an hman John Collins-a, kum 75-a upa a ni a, London hranghlui misual a ni. Kum 1961 khan rukruk leh mibum thubuaiah te an lo man zak zak tawh a, a chhuah hnuah halpuah lamah leh thil hlui hralha te a sumdawng a, rukrukna an kalpui lai hian sumdawnna lamah a chawl titih tawh a, mahse rukru thang tih takah sum tam tak hmuhna tur chu a hnar zo bik lo te pawh a ni ber awm e.
Anni bakah hian inhnamhnawih dangte chu kum 48 mi Hugh Doyle-a, Ireland-a seilian kum 60-a upa William Lincoln-a, an thil ruk chhuah lo dahtha a, lo sawnkualtute bakah Basil-a te an ni a. Basil-a hi tunge a nih tih tun thleng hriat chhuah a ni lova. Police te rindan chuan Hatton Garden-a thawk, a building chinchang hre tak mai leh an ralkhel dar kam lo sut a, rukrute in chhunga hruailuttu ni turah an ngai a. Luman dollar 29000 a nei mek. Basil hi Danny Jones chuan police officer hlui leh he rukruknaa an thluak bur ber niin a sawi a, mahse police te chuan chutiang chu kan nei lo an ti ve thung.
Khawvela bank leh thil hlu dahkhawmna hlawhtling taka rawkna chu thalai zawkte tih a ni thin a. Mahse tun tuma kan changtute, misual ni pahfawm bawk chu cancer vei, zunthlum nei, khum leh kawnga thir an phum tawh, natna benvawn nei leh bengchhet lek lek te an ni a. British-in misual a lo hriat tawh thina a hnuhnung berte an ni ta awm e. Chuti chung chuan rukrukna turu em em mai an hlen chhuak thei tlat a ni.
Lunghlu dahkhawmna rawk tur hian kum 2012 chho atang khan ruahmanna an lo siam tan tawh a. A tirah chuan Reader-a hian mi pathum a sawmkhawm a, an pindan awmkhauh dahna hi inhnuaiah a ni a. Safety depost box hawh ve duh anga insawiin an zinga pakhat chu an tir lut a, chuta tang chuan a awmdan ruangam tur chu an hre thei a. Venhimna panna lai tur an dap ta a ni. Hatton Garden Safe Deposit awmna hi chhawng 7 a sang a ni a, a hnuailam chu an luah a, a chungah lunghlu chher leh sumdawng 60 vel an cheng a ni. In chhunga luhna kawngkhar chu thinga siam a ni a, zing dar 9 atanga tlai dar 6 thleng an hawng a, in luahtute chuan chahbi a hranpain an kawl vek thin.
Kawngkhar atang chuan lobby lian vak lovah a va chhuak a, chumi hnuai lam chu safe deposit box an dahna chu a ni ta a. Elevator hmanga chhuk theihin an siam thin a, mahse kum 1970 chhova silai keng chunga an rawk hnuah elevator chu hman theih lova dah a ni tawh thung a, step-a chhukthlak a ngai tihna a ni. Step tawpah chuan kawngkhar, thinga siam leh thira a kharna dang an siam tel bawk a awm leh a, chu kawngkhar hawn chuan a bul lawkah alarm system awmin second 60 chhunga sut hman tur a ni a, sut hman loh chuan ralkhel dar chu a ri dawn a ni. Heng kawngkhar hi vengtute leh hawn theih loh a nih avangin chumi tawn tlang chu a hautak lai a ni a
A kawng awlsam ber chu kangmei chhuah thulha tlan chhuahna tur niin Greville Street leh chu fire exit kawng chu a inzawm a, pawn lam atang chuan hawn theih ni lo mah se chhung lam atang chuan awlsam taka hawn theih tura dah a ni a, rikrum thila hman tur a ni a, hawn a harsa thiang lo. Reader chuan lut turin chhunglam mi emaw, he hmun hrechiang leh kaltlang zung zung thei tur a mamawh a, chu chu Basil-a rawn lanna chu a ni ta a, kawngkhar hawnsak thei tur thawhpui an neih hnuah an ruahmanna chu a taka kalpui turin an duang fel ta a. British-a inrawkna sawi ban theih tawh loh tur chu i kalpui teh ang, man lohvin hausak takin kan chhuak ngei bawk ang tih rilru an pu ta nghe nghe awm e.
Kum 2015 a rawn inher chhuak a, January thlaah lunghlua sumdawng, he hmun bul lawka cheng Wiffen-a phei chuan miin an thlithlai tlat anga hriatna a nei a, a awm a nuam thei lo. March htla tirah Katya Lewis-i chuan safe deposit box awmna in number 88-90 hi tlawh lehin, elevator hman theih awmchhun chu a nghak a, rei tak a nghah hnuah kawr pawl ha tar lam tawh hian siamthat a nih thu leh, tunah rih chuan a hman theih loh tih a hrilh a. A mi hmuh chu Danny Jones-a a ni a, elevator khawih chingpenin a lo inruahman lawk a lo ni.
April ni 1 a rawn inher chhuak a, chhun dar 12:30 ah leihnuai, Victorian hunlaia an siam tawh, electric leh phone hrui an kaltirnaah gas leak avangin kangmei a chhuak. Leihnuaia luhna tur awng an siamah te chuan meikhu a rawn chhuak a, a rawn alh zuai zuai mai bawk a. Power supply a khaihlak a, mipui thiar chhuah an ngai zui ta a, mi sang tel chu hmun him lamah dah chhuah niin an zingah hian Royal Courts of Justice-a judge leh zirlaite, London School of Economics-a awm mekte pawh an tel a. Kangthelhtute an rawn lut a, ni hnih hnuah chu kangmei chu an thelh mit thei a ni.
Heng kangmei chhuak hi tihpalh thil mai mai a ni lo, Hatton Garden hi London laili, a hulum laia mi a ni a. Mihring an tam chuan rukrute hian man chhuah theihna remchang a tam dawn tih an hria a, mihring tlem thei ang ber chulai hmunah chuan awm se an duh a. Chumai bakah kangmei khan an ralkhel dar kamte chu a tiri a, alarm dik lo pek chhuahtir chu alarm an sut hman loh pawhin vengtute bumna atan an la hmang thei dawn a ni.
Hatton Garden hi medieval hunlai atang tawha lunghlua sumdawnna hmun a ni a. Rawk leh suam an lo tawh fo tawh avangin safe deposit hi an lung mantamte a him zawk theihna turin din a ni a. Chuti chung pawh chuan rawk a lo ni fo tawh. Ralthuam nena lut te, safe deposit hman tum anga insawi, hmuh loh lama mi safe depost box lo khawih chingpen tate an awm a. Mahse kan tarlan tak ang khan he hmuna company 300 chuang leh dawr 60 tel an lunghlu zawrh dah duh loh khawpa inrawkna lian tham a thleng ngai lova. Safe deposit company hian him tawk turah an ngai. April thlaah Good Friday leh Easter Sunday hmang turin Ningani tlaiah chu hmun chu an khar a, Easter-in a zui dawn avangin Thawhlehniah chauh an hawng dawn a, vengtute pawh an hawtir a. An safe deposit dahna chu thir awmkhauh, a verha verhtlang rual loh tur leh puakthei thil hmanga beihna pawh dawl zo tur. Hawng tura mi pahnihin a combination an hriat a ni a. An bang lah chu cement feet hnih vela chhah a ni bawk a. Him tawk hle tura an ruat avangin lunghlu lama sumdawngten an thil zawrh an dahna chu mihring venhim tul lovah an ngai a, alarm an kam a, an duhtawk ta deuh der a ni.
Easter chawlh hmang tura an inkhar ni, April ni 2, Ningani zan dar 8:19-ah Brian Reader leh a hote chu an che chhuak tan ta a. Reader hian tar ten a thlawna bus an chuan theihna tur ticket a neih hmangin chu hmun chu a pan a, van varin midang pawh an rawn thleng a. Gas lam khawihtu anga an lan theih nan hnathawh kawr an rawn inbel nghe nghe a. Ni thum chhung che turin an inruahman a, safe deposit box 996 chu ruah fai vek an tum a. Zunthlum nei Terry Perkins-a phei chuan a damdawi ni thum tla tur a rawn paipawn tel nghe nghe. Mi palite chu Greville street-ah chuan an awm a, lirthei khalhtu leh lo thlithlaitu chuan a lirthei chu an bul hnaiah hungin a chhungah a lo nghak a. Dar 9:18-ah sam sen, Basil chu thil pu chungin a rawn kal veleh a. CCTV-a a hmel thupna atana thil rawn pu a ni. Dar 9:20 ah thing kawngkhar chu chahbi hmangin a rawn hawng ta a. Khawi atangin nge chahbi a neih tih hi hriat chhuah theih a ni lo. In chhung atang chuan kangmei chhuah thulha hman tur kawngkhar chu hawngin, chuta tang chuan a thiante chu an rawn lut veleh ta a. An mamawh turte chu bawlhhlawh bawmah dahin an nawr lut tel nghal a ni.
Elevator kha in chung chhawng hnihnaah an dintir a, a kawngkhar an hawngin hman theih loh tih an tar a. Chu chu leihnuaia an khawngkhar chu a ni.
Leihnuaia pindan awmkhauh va thleng turin kawngkhar hawn tur an la nei nual a, a chahbi a neih loh avangin a chhuk dan awlsam ber chu elevator kalna awng chu a ni a. Chuta tang chuan Jones leh Basil te chu an lut thla a, thir phan, leihnuai a thlen lohna tura an siam chu tichhiain feet 12 vel an chhuk thlak leh chuan leihnuai chu an thleng thei ta. Chumi hnua an tih leh hmasak ber chu alarm an kam sut a ni a, alarm system leh telephone cable inthlunzawmna chu an chep chat a, a transmitter an tichhe nghal bawk a. Step chhuah thlaknaa thing kawngkhar thuahna thir, electric hmang chu a power cable tichhiain an hawng a, thing kawngkhar pawh an hawng thei ta bawk a. Midang palite chu an rawn lut ve thei ta a ni.
Metal grinder hmangin thir kawngkhar la awm chu an tichhe leh a, pindan awmkhauh chu an thleng thei ta a, rosum thahnem tak nena daidangtu chu vault kawngkhar rinawm tak mai leh bang feet 2 vela chhah, thira an thuah tel chu a ni ta.
Kawngkhar hi bei pawh nise an hlawhtling dawn lo tih chu a hma atang daih tawhin an hre sa tawh a, chu aiah chuan a bang zawk chu luhna atan hman an tum chu a ni a. An bungraw mamawh tur chu an han phawrh chhuak a, bang verhna tur khawl chak zet mai a lo ni a. Lunghlu lak chhuahna atan lunghlu vek an hmang dawn, a verhna pui ber chu lunghlu a ni a, minute 1-ah vawi 667 vel vir hmanin lung leh concrete verhna tur atana duhthusam a ni a, a sat lutuk lohna turin tui hmang tihdaih thin a ni bawk.
Bang chu centimetre 25 vela lianin an verh dawn a, chuta tang chuan an zinga te ber chu a lut tawh mai dawn a ni. He bang verhna chungchang hi youtube atanga an hriat a ni ta nghe nghe awm e. Bang chu an verh ta a, an hriat miah lovin man chhuah an ni teuh khawp mai. Khatia alarm system an sut emaw an tih khan vengtu hnenah chu ralkhel dar chuan message a lo va thawn hman hi a lo ni a. Vengtu chuan chuan Hatton Garden in number 88-90 chu a rawn tlawh a. Pawn atangin thil dik lo a awm em tih a rawn thlithlai a, mahse engmah a hmu lova, thawm danglam han hriat tur a awm lo bawk. Kangmei chhuah tum khan false alarm a lo tiri tawh kha a ni a, chutiang bawk chu ni turah a ngai a. Police lam pawh a hriattir a, chu alarm chu bawhzui lohvin a awm ta thung a. Vengtu rawn kal lai hi zing dar 1 vel a ni.
Bang verh hna chu a kal zel a, kum 1946 a he hmun an siam atangin tumahin an la verh tlang ngai lova, mahse an khawl Hilti DD350 diamond coring drill chuan a ngam khawp mai. He khawl an hman kher chhan hi a thawm a zawi a, concrete nawi a vawrh chhuak nasa lo bawk a, an tan chuan a remchang ber a ni. Darkar hnih leh a chanve chhung an verh chuan hmun thumah mihring leng turin an verh tlang thei ta a. Mahse bui lung tawk tih zawng zawng an nei ta vek mai. Pindan awmkhauh chu a lo inhawng nghal huau miah lo. Safe deposit box an dahna cabinet hnung lam, ceiling leh chhuata an kilh beh tlat paltlang an la ngai a ni. Hemi tur hian hydraulic jack chu an inchhawp a. An vanduaina ai turte pawh a ni maithei. Cabinet an tihchhiat hmain an jack chu a chhe ta hlauh mai a. Pindan awmkhauh chhung an lut thei ta lo zel. Danny Jones leh Carl Wood te chuan tihdan tur an ngaihtuah a, in chhung atangin engmah tih theih a ni lo tih an hria a. Chuvangin Good Friday ni zing dar 8-ah lunghlu ruk chhuah an tumna chu an chawlhsan lailawk ta a ni.
Vawikhat an chet chhuahnaah hian an hlawhtling lo a nih chuan, an hna zawh loh va chhunzawm tura va kir leh chu an ruahmannaah a tel tawh lova, thil kalsual palh se tia chet lak dan tur engmah duan a awm tawh lo nen, man chhuah a hlauhawm hle a. Chuvangin an khaipa ber, The Governor an tih mai Brian Reader chu an hlawhchham hnu hian kir leh a duh tawh lova, kan kir leh chuan min man ngei ang, a ti a, rilru hlauthawng reng renga awm chu a peih tawh lo te pawh a ni maithei. In hnuai atanga an chhuah hnuah hian relin in lamah a kir nghal a ni.
Mahse Jones leh Collins te erawh chuan kan thleng tep a, kan bansan thei lovang tih rilru an pu ve thung a. Hna zofel turin an hmanraw mamawh lei turin an chhuak ta a. London-a Twickenham-ah a tuk Inrinni-ah hydraulic jack chu an pahnihin an va lei a. Jones hian a leitu hmingah V.Jones tiin a ziak a, a address dik tak a pe tel bawk.
Inrinni zan dar 10-ah lunghlu dahkhawmna hmunah chuan an kir leh ta a, Brian Reader-a bakah Carl Wood te chu an lut ve duh ta lo thung a. Jones, Collins, Perkins leh Basil-a te an che chhuak a. Collins hian pawnah a lo nghak leh a ni. An jack hmang chuan cabinet chu an kar ta a, nekna ton 10 vel tur an pek hnuah cabinet chu a tlu ta a, lunghlu hmunpui, rukrute tana el dorado chu an va pawh thei ta. Pindan awmkhauh chhungah chuan a thahrui ngah leh inthazo ber Jones leh Basil te chu an tuboh khin tha nelh nawlh, angle grinder leh thir tiang kawm khin nen an lut ta a, tunah chuan safe deposit box va hawn chiah an hmabak ta.
A tira safe deposit box 996 hawn ruah vek an tum kha 73 chiah an hawng thung a, hun an nei tawh lo tihna pawh a ni hran lo, mahse hlauhthawnnain an khat tawh te pawh a ni maithei. An hawnte hi bitum bik nei lovin a remchang apiang an hawng nge, rosum tamna lai hriain an hawng tih chu hriat theih a ni lo. Mahse an safe deposit suam atang hian lunghlu la chei mawi loh te, tlereuh manto leh pawisa te an la chhuak nual a, a hlutna chu dollar matkaduai 40 chuang ni tura ngaih a ni a, safe deposit box thenkhat pheiah phei chuan dollar maktaduai 2 chuang hu thil hlu a awm a ni. Heng tar rukrute hian Hatton Garden-a lunghlu sumdawngte hi an dim reng reng lo, mi hausa tak vekah an ngai a, mi hausa rawk chu sualah an ngai chiah lo.
Easter Sunday, April ni 5 zing dar 5:45-ah zan khuaa an thawh hnuah pindan awmkhauh chu an chhuahsan ta a, an hnu enin an hmanhmawh hle niin a lang a, an bang verhna leh an jack chhe ta te ken chhuah an tum hek lo. An thil ruk chhuah erawh chu bawlhhlawh bawmah an dah a, an nawr chhuak a, Collins-a mercedes car var, a hmaa thil leina atna an lo hman tahw hmangin tlanliam a, Britian-a lunghlu ruk chhuahna ropui berte zinga mi chu an hlen chhuak ta. Collins hian rukrute chu an chenna in theuhvah a va thlah a ni.
Pindan awmkhauh leh a chhehvelah khan hnu hnutchhiah mah se forensic lama anmahni chhuizui theihna tur lam thil engmah an hnutchhiah lova, forensic lamin an chhui theih tur zawng zawng chu an lo zirchiang hmasa vek tawh a. An hnathawh lai zawng hian an fimkhur piah lamah an chhuah dawnah anmahni chhui theihna tur a awm em tih an ennawn leh thlap a ni.
April ni 7-ah Hatton Garden Safe Deposit hawng turin vengtu chuan kawngkhar a hawng a, leihnuaia pindan awmkhauh a zuk thlen chuan a bang chu a lo kaw huau mai a, a chhungah chuan safe deposit ruak thehthal awm nuai mai chu a hmuh theih bawk a. Rawk an ni tih hai rual a ni lova, police lam a pun zui ta nghal a. Minute 15 hnuah an rawn thleng a. Rei vak lovah lunghlu leh thil dang dahtute pawh an rawn pungkhawm zui ta nghal a. Mi tam takin an thil neih zawng zawng deuhthaw an chan tih an hria a, an safe deposit box an khawih tel em tih hriat chian an duh nen, an mangang hle.
Media lam an rawn thleng zui a, chu rukrukna chu khawvel hriata puanzar a ni ta a. Police te hian in chhungah tumah luh an phal lova, ni 5 hnuah rukrukna tuartu lunghlua sumdawnte an ko ta hlawm a. Safe deposit box-a i dah ho han sawi teh le an tih chuan a tam berin an thil dah chu an hrechiang lova, thenkhatin an sawi duh lo bawk a. A sawi duh lote hian chhiah awlruk an tum vang ni tura ngaih a ni a. Hei vang hian rukrute hian engzat nge an lak chhuah chiah tih chu hriat theih a ni ta lova, dollar maktaduai 40 man ai pawhin a tam daih maithei a ni.
Police-in CCTV an zirchian atangin pawikhawihtute luh dan hi chu an hrethiam nghal a, mahse dem an hlawhna erawh a nep chuang lo. Alarm system rik chungchang hrilh an nih laia an bawhzui loh avangin an hna an tlin lovah an ngai a, Hatton Garden Safe Deposit company pawhin an sumdawnna a pawimawh ber, mi rin an hlawhna chu nasa takin an chan a, Hatton Garden unsafe deposit company ti hialin an chhuah a ni.
Inrawkna atanga kar 6 a liam a, pawikhawihtu man chhuah tur an la awm lova. Rukrute erawh chuan ruahmanna an siamna hmun zu dawrah hlawhtlinna an lawm tawh a, Scotland Yard lamin an hnu chhui ngaihna an hriat loh avangin an thin a rim hle tih an hria te phei chu nuam an ti khawp mai. Jones-a’n a awm loh hnua an chet dan Reader-a leh Woods-a te an hrilh phei chu nuam a ti thei khawp mai. Misual uaithla lam tawh, pawikhawih tawh lo tura ngaih an nih laia mi zawng zawngin an sawi rukru an ni thar leh thu tlangval tha leh ang deuhva inhriatna te pawh an nei ta awm e. Mahse an hriat loh lamah hnu an hnutchhiah a, inbawk fel lo lai awm chu hai chhuah a ni tih reng reng an hre pha lo.
London Metropolitan Police dept hnuaiah khuan kum 1919 ah Flying Squad an din a, pawikhawihna a thlen a, hnu chhui tura rang taka thawk chhuak tur leh, ramriin a dan ve loh turte an ni a. A bikin rukru umzui kawngah an tha zual bik a tih theih awm e. London-a misual ho atangin thu hriat dan an hre tha riau a, chuvangin Britian-a pawikhawihna lian leh hmingthang tak tak pawh an lo chingfel fo tawh thin a ni. He inrawkna chhui tur hian Scotland Yard chuan officer 50 vel a tir chuak a, Flying Squad-in unit pahnih vel a thawh ve bawk a, an hotupa ber chu Peter Spindler-a a ni. A hovin finfiahna leh hnu chhuizui theihna tura ngaih 350 vel chu an zirchiang ta a, chung zingah hian CCTV 120 chuang video footage te a tel a, media leh mipui atangin nawrna a nasa nen, rukrute chu man chhuah vat an ngai.
Brian Reader-a’n kan lut tha leh a nih chuan min man ang a tih kha hnu an hnutchhiahna lai tak chu a ni a. CCTV footage atangin Collins-a lirthei, merecedes car var chuan Hatton Garden hi Easter bawr velah a paltlang ngun hle tih an hmu chhuak a, chu lirthei var chu chhui zui tlakah an ngaiin a neitu an zawng a, mi tang hlui Kenny Collins-a a ni tih an hre chhuak ta a. A zan hmasa berah khan van varin an inkhalh chhuak a, khami zan khan hlawhtling nise chu man chhuah an ni kher lovang. Van var hi tuta nge tih an hre chhuak zo lova, an zawng hmu ta miah lo bawk a ni.
License-plate recognition hmangin Collins-a car tlanna chu an chhui ta a, Jones-a chenna in an chhui thleng a, chuta tang chuan hydraulic jack an leina Twickenham lam an chhui thleng leh ta bawk. Bungraw zawrhna dawr an va tlawh chuan V.Jones-a’n jack a lei tih te an hre ta zel bawk a. He pawikhawihnaah hi an kuthnu ngei a ni tih rinna an nei ta. Lunghlu dahkhawmna an rawk lai khan walkie talkie hmangin an inbia a, mahse a hnuah erawh an phone an hmang thung a, chu chu an inchhui chhuahnaa a pawimawh lai ber chu a ni ta a. Rukrukna hi chu tualthahna ang deuh a ni a, tualthahnaah ruang atangin hnuchhuituten bul an tan thin ang deuhvin rukruknaah pawh an thil rawk atangin an chhui a, an kual zel hnuah phone-ah an chhui thleng ta a. Kan putar rukrute hian an phone hi vawikhat hmanah thlak zel nise chu an him thei tur a nih laiin a ngai an hman zui zel avangin an mi biak thante chu an dapkhawm a, tan ina lut tawhte chu rinhlelh zingah an rin lut ve thei tawh a. Mahse han manna tur khawpin finfiahna a la tha lo thung.
Hei vang hian Scotland Yard leh Flying Squad te chuan enthlak hna an thawk ta a, an kalna apiangah a rukin an rinhlelh ho chu an zuiin an lirtheiah aw ngaihthlakna an dah a, an zu dawr chawlhna thinah chuti bawk chu. Chutah chuan Perkins, Jones leh Collins-a ten lunghlu dahkhawmna an rawk dan uanpui tak maia an sawi te pawh hriat tur a awm ta a. An inbiakna video, an tawng hriat theih loh atangin an hmuiphun hmangin finfiahna an hmuh belh zel a, Reader-a hnena Jones-a’n an chet dan a sawi te pawh an hre zel bawk. Mahse kum upa tawhte duhthusam sawi mai mai tiin rorelna inah a la tan theih avangin heng an finfiahnate hi thubuai awrhtir a, thiam loh chantirna atan chuan a la tlak loh thung a, boruak daih deuh hun an nghak ta a ni.
Police lamin an ngaihven zualpui a reh tawh anga an ngaih hnuah misualte chuan an lunghlu, rangkachak leh thil hlu dang an ruk chhuahte chu hralh a, an pension atan leh an chhungte chawmna atana hman an tum ta a. An thil ruk chhuahte khan Kenny Collins chuan a then chu chhuarah a thurku a, a tam ber chu Bill Lincoln-a hnenah a kawltir thung a. Bill-a hian Collins-a hnena hlan leh turin taxi hmangin a phur chhuak a, Enfield veng CCTV hnuaiah tak mai an inhlan a, Collins-a fimkhur loh vang liau liau a ni. An thil ruk chhuah an inhlan ni hi May ni 19, Thawhlehni zing dar 9:44 ah a ni a. Collins hi enthlak lai a nih avangin Flying Squad te chuan an thil inpe lai zawng zawng hi an lo hmu vek a. An insemna tur, satalhna an tih mai pawh chu a hmaa a address an sawi, an inbiakna an ngaihthlak ruk atangin an hre tawh bawk a, Enfield-a Terry Perkins-a fanu in a ni.
Chumi ni dar 10-ah chuan Flying squad te chu an thawk chhuak nghal a. Anmahni pui turin police officer 200 vel zet chu Enfield atang Bethnal Green thlengin an duty a, tlanchhuahtir an tum lo hle. Kil tin atangin in chu an hual hnuah in kawngkhar an tichhia a, an va luhchih ta a. Rukrute leh an thurualpuite chu an rut fai vek a, an zinga a tangkai ber leh kawngkhar hawngtu Basil erawh a tel ve ta lo hlauh thung. Thuneituten an va luhchilh lai hian rangkachak dollar maktaduai 3 atanga maktaduai 4 man hu tur chu chhuang tuiin thil danga siam an lo tum mek a. A inthazo ber Jones chu tlanchhiat han tum ve sateh mah se pawna huan bak a pel hman lo.
An vaiin police hmunpui lamah hruai an ni a, thu an zawhfiah chuan inhre ngai lo angin an insawi hlawm a. Mahse an inbiakna zawng zawng an rawn phawrh chhuah theih takah chuan man an ni tih an inhai lova, Collins phei chuan bail ka dil buai peih lo, min pe dawn lo chiang a, chu ai chuan thingpui min pe zawk ula ka hmu hma zawk ang, te a ti nghe nghe. Reader, Perkins leh Jones te pawhin thiam lohna nei anga insawi an tum ta bik lova, an inpuang ta a ni. An in an dap atangin thil hlu leh rukrukna an hmanraw hmante pawh an hmu chhuak ta zel bawk a. Rukru tan hian hnu chhui theihna an hnutchhiah miah lo chunga man an ni ta chu a hrilhhai thlak viau awm e.
An thil ruk chhuah erawh chu engzat nge tih hriat a ni lova, mah se a landan atangin a kim lo nasa hle tih a hriat theih thung a. Jones-a khan tan in atangin a hnuah a thil ruk a dahna chu a puang ta nghe nghe a. London hmar lama thlanmualah a ni. Chu hmun chu police te darkar 2 chhung an hai a, thlan pakhat atangin lung man tam leh thil hlu dang an hmu chhuak a. Chu chu Jones hian a hre lo. Kar khat hnuah amah hruaiin a thuhrukna chu an va hai leh a, a aia tlem a thuhrukna chu an va hai chhuak leh ta a ni.
He pawikhawihnaa a bultumtu pali Reader, Jones, Perkins leh Collins te chu thiam loh chantir tur an ni chiang sa a, midang Wood leh Lincoln te chu pawh thiam loh chantir an niin Doyle-a pawh thubuai awrhtir a ni a. An rinhlelh zinga mi John Harbinson erawh thiam chantir a ni thung.
